Сезоната на цреши во 2025 година е обележана со големи ценовни разлики низ Европа и светот, првенствено поради неповолните временски услови, намалените приноси и зголемената побарувачка на меѓународниот пазар. Од луксуз на пазарите во Западна Европа, до поповолни цени во земјите производители, црешите останаа овошје кое не се јаде без да се размислува за паричникот оваа година.
Во Шпанија, еден од водечките извозници на цреши, почетните цени за црешите одгледувани во стаклена градина беа до 75 евра за килограм, но се стабилизираа на околу 35 евра за килограм со зголемувањето на понудата.
Во Бугарија, поради доцниот пролетен мраз, родот беше значително намален, па цените скокнаа на околу 48 лева (24,50 евра) за килограм, рекордно ниво за оваа земја.
Турција, уште еден голем извозник, се соочува со сличен проблем – временските услови ја загрозија жетвата, па се очекува цените да скокнат до 50 проценти во споредба со минатата година.
Во Украина, пролетните мразови им се заканија на раните сорти, а последиците за пазарот сè уште се проценуваат.
Свет: Цената варира до 10 пати
На азискиот пазар, ситуацијата е подеднакво динамична.
Во Кина, црешите се продаваат за околу 6,91 долари (6,21 евра) по килограм, што ги прави релативно прифатливи во споредба со европските цени.
Во Тајланд, увезените новозеландски цреши достигнуваат цена до 58,98 долари (52,98 евра) по кутија, во зависност од квалитетот и потеклото.
Во Узбекистан, каде што сезоната штотуку започнува, првите цреши се продаваат за 80.000 до 100.000 соми за килограм, што е околу 6,15 до 7,70 (6,92 евра).
Глобални трендови
Според „Чери Тајмс“, глобалниот пазар на цреши вредел 62,5 милијарди долари во 2023 година и се очекува да расте со стапка од 7,3 проценти годишно до 2030 година.
Овој тренд јасно покажува дека црешите стануваат сè побаран, но и сè поскап луксуз во многу делови од светот.