Европската агенција за лекови одобри употреба на дексаметазон за третман на пациенти со Ковид-19 кои имаат проблеми со дишењето.Овој стероид е втор одобрен лек за третман на Ковид-19 во Европа по ремдесивир.
Европската агенција за лекови (ЕМА) во петокот објави дека дексаметазонот може да биде опција за лекување на возрасни и адолесценти на кои им е потребна терапија со кислород или респиратор, откако ги разгледа резултатите од студијата на британските научници.
Студија наречена „RECOVERY“ спроведена од научници од Оксфорд покажа во јуни дека дексаметазонот ја намалува смртноста за околу една третина кај тешко болните лица со Ковид-19. Лекот, во меѓувреме, е одобрен во Јапонија за третман на Ковид-19.
Лекот се користи со децении, тој е ефтин и лесно достапен. Често се користи за разни воспалителни состојби. Компаниите сега можат да побараат дозвола од нивните национални регулатори или ЕМА за дополнителна употреба на лекови.
Препорачаната доза за возрасни и адолесценти, на возраст од 12 години и со тежина од најмалку 40 килограми, е 6 mg еднаш на ден во рок од десет дена.
Европската комисија издава овластување за лекови и обично ги следи препораките на ЕМА. Антивирусниот лек ремдесивир е првиот одобрен лек за Ковид-19 во Европа. Тој беше одобрен во јули.