Деспотовски: Не даваме пари однапред – Next.e.GO има рокови и обврски кои треба да ги исполни

од Vladimir Zorba

„Со новиот концепт на ТИРЗ воведовме механизми за заштита на јавниот интерес“, изјави Јован Деспотовски директор на ТИРЗ за вестите на Канал 5.

„Апсолутно сите клиенти, и потенцијални и актуелни, поминуваат низ процес на детална проверка. Ангажираме меѓународна ревизорска куќа која во првичниот извештај за оваа компанија не индицираше никаде сериозен ризик. И самиот договор кој што го потпишавме вчера содржи заштитни клаузули. Доделувањето на државната помош зависи од динамиката со која инвеститорот ќе ја реализира инвестицијата и, секако, од исполнување на условите предвидени со договорот. Компанијата нема да добие пари однапред туку има конкретни рокови и датуми кои треба да се испочитуваат. Напоменувам дека државната поддршка ќе биде реализирана во наредните 5 години и како што кажав имаме механизми да го заштитиме јавниот интерес“, рече Деспотовски во врска со договорот кој вчера беше потпишан со германската компанија „НЕКСТ.Е.ГО МОБИЛЕ” која ќе инвестира во фабрика за производство на електрични автомобили.

Деспотовски посочи дека првите е.ГО автомобили од македонско производство се очекуваат во 2024 година.

„Фабриката за електрични автомобили во Тетово ќе почне да се гради на есен,а според договорот а пробното производство се очекува во 2024 година. Тоа е целта која што инвеститорот согласно деловен план и потпишаниот договор од вчера има обврска да ја исполни“, најави директорот на ТИРЗ.

Деспотовски нагласи и дека се работи за компанија која е тесно поврзана со техничкиот Универзитет во Ахен кој е во топ два проценти од светските Универзитети по сите глобални рангирања. Инвестицијата на компанијата во Тетово е 130 милиони евра, а предвидено е отворање на 900 нови работни места, како и бруто плати, што во просек достигнуваат 2,5 пати над просечната во државата. Државната помош нема да надмине 35 отсто од вкупната инвестиција, а доделувањето на средствата зависи од динамиката на реализација на инвестицијата и исполнување на условите предвидени со договорот. Компанијата нема да користи даночни ослободувања, туку во целост има обврска истите да ги плаќа кон Буџетот и јавните фондови на државата. Овој модел на државна поддршка е усогласен со регулативата во ЕУ, а е подеднакво достапен за сите странски и домашни компании.

Слични содржини