„Не бре брате, јас не се оптоварувам со овие прашања. Јас сум фокусиран на моите обврски како претседател на Собранието, го спроведувам Уставот и деловникот на работата на Парламентот“, вака собранискиот спикер Талат Џафери вчера ги коментираше кривичните пријави што ги поднесоа опозициските партии против него и заразените пратеници кои со скафандери присуствуваа во Собранието.
Со Устав, објаснува Џафери, пратеникот не сноси одговорност за ставовите и неговиот став во Парламент, затоа не може да има ниту кривична одговорност. Тоа е уредено и со протокол, пратеникот кој е позитивен на коронавирус да дојде на седница и да овозможи функционирање на Собранието.
„Доколку општата здравствена состојба не е тешка и е во домашни услови, со посебни протоколи за движење од домот до Собрание и обратно, не го става никого во опасност, не се исклучува можноста тој да учествува бидејќи е Уставна определба и санкција“, посочи Талат Џафери за емисијата „10 минути“ на ТВ 21.