Европската унија ќе донесе финансиски пакет од 1.800 милијарди евра што ќе овозможи економско закрепнување од пандемијата на коронавирусот дури и ако Унгарија и Полска опстојуваат на своето вето, изјави европскиот комесар за економија Паоло Џентилони
Будимпешта и Варшава го блокираат усвојувањето на повеќегодишниот буџет на ЕУ за периодот 2021-2027 година вреден 1.100 милијарди евра и планот за закрепнување вреден 750 милијарди евра бидејќи законодавниот пакет вклучува одредба со која исплатата на парите зависи од почитувањето на владеењето на правото.
„Нема да попуштиме на ветото“, рече Џентилони на конференцијата организирана од Италијанскиот институт за меѓународни политички студии ISPI и Министерството за надворешни работи.
„Премисата е дека сме многу јасни кон тие земји-членки, ќе одиме понатаму без нив“, рече поранешниот италијански премиер.
Џентилони рече дека е загрижен за тековните конфликти со двете источноевропски земји, но исто така изрази уверување дека тоа може да се надмине со договор благодарение на дипломатијата.
Унгарија и Полска во петокот соопштија дека немаат намера да попуштат.
Позицијата на Полска останува непроменета, изјави портпаролот на полската влада Пјотр Мулер на Твитер.
Полскиот вицепремиер Јарослав Говин во четвртокот изјави дека Полска може да се откаже од своето вето доколку европските лидери усвојат изјава со која се појаснува врската помеѓу фондовите на ЕУ и владеењето на правото.
„Интерпретативната изјава треба да биде … јасна изјава од Европскиот совет дека правилото за условеност нема да се користи за да се изврши неправеден притисок врз одделни земји-членки во области кои немаат никаква врска со правилното користење на средствата на ЕУ“, рече Говин.
Унгарскиот премиер Виктор Орбан за јавно радио изјави дека полскиот предлог е неприфатлив за Унгарија.
„Тоа решение, приложувајќи некоја изјава како потсетник на самолеплива хартија прикачена на парче хартија, не функционира за нас“, рече Орбан. „Унгарија инсистира на раздвојување на двете“, рече тој.
Веројатно последната шанса за надминување на блокадата ќе биде самитот на лидерите на земјите-членки, што ќе се одржи на 10 и 11 декември.