„Не ветивме само така, не падна од небо, туку се фокусиравме на ветувањата што ни ги дадоа Брисел и другите европски градови. Ако не го исполнат ветувањето што ни го дадоа, ние не можеме да го исполниме ветувањето што им го дадовме на Македонците и на сите други народи кои живеат во Северна Македонија. Ова го искривува наративот и ни прави огромен проблем. Ако ЕУ е куќа која има куќен ред, електрични инсталации, вода, ние сме една соба во таа куќа која е надвор од куќниот ред. И тоа не е само наш проблем, туку и на другите простории во куќата. Ако таму е топло, а овде е ладно, тоа влијае на температурата на целата куќа“, вели вицепремиерот за европски прашања, Никола Димитров во интервју за „N1“, зборувајќи за евроинтеграцискиот процес на Македонија и ветувањата од ЕУ.
Димитров смета дека е „многу поскапо за Европа или ЕУ да го игнорираат Балканот отколку сериозно да се ангажираат и да ни помогнат да го направиме европски во смисла на здрава демократија, правда, слободни медиуми, човекови права, европски стандарди. Да ја донесеме Европа дома. Затоа што ако не го направиме тоа, младите ќе ја бараат својата иднина некаде надвор од државата“.
Зборувајќи за односот со Бугарија, Димитров вели дека во интервју за Би-Би-Си, на прашањето за пријателството со таа земја, одговорил дека со нивната политика кон Северна Македонија, тие го отежнуваат.
„Негирањето на јазикот на соседот не може да биде пријателски чин. Или да не го прифати неговото право на самоопределување. Јас, Никола, сум Македонец, Балканец, Европеец и на некој начин граѓанин на светот. Не дозволувам мојата земја да се меша во мојот идентитет, а не некоја трета земја. Јасно ми е дека земјите-членки имаат свои интереси и сакаат да ги исполнат користејќи ја својата тежина како земја-членка на Унијата, каде што сакаме да влеземе“, вели Димитров.
Тој посочува дека, сепак, мора да има одредена пристојност во барањата. Што ќе се случи ако утре некоја земја-членка побара од нас, на пример, да и дадеме половина од нашата територија, прашува Димитров.
„Мора да има врска меѓу барањата и вредностите на ЕУ. Лисабонскиот договор, еден од уставните столбови на ЕУ, наведува дека европскиот континент е континент кој ја слави културната и јазичната различност. Сега македонскиот јазик не може да биде проблем ако одиме како организација која ја слави различноста. Не може да се поставуваат антиевропски услови на патот кон Европската унија, ако таа Унија е сè уште европска. Ние сме во класична ситуација кога историските прашања, кои не се актуелни во 2021 година, кои можеби беа актуелни на почетокот на 19 век, ја држат во заложништво иднината. Не можеме да го промениме минатото, ниту пак географијата. Единственото нешто што можеме да го промениме е денес и утре. Се надевам дека ќе направиме, влогот е огромен. Бугарија со тоа што го однесе во Брисел, билатералното прашање го претвори во европско. Не сме само ние блокирани, блокирана е политиката на Европската Унија кон Балканот, кон регионот“, заклучува вицепремиерот Димитров во интервјуто.