Согласно одлуката на Владата за примањето на бегалците од Авганистан, ние ги презедовме сите мерки за проверка и безбедност на овие граѓани, изјави денеска директорот на АНБ, Виктор Димовски, попладнево на прес-конференција.
-Засилените безбедносни мерки и интензивната комуникација со партнерските безбедносни сервиси ќе бидат континуирани за цело време на нивниот престој, а во функција за ефикасна заштита на националната безбедност, како и личната сигурност на авганистанските државјани. Мора да напоменам дека соработката досега е највисоко професионално ниво, и посветеноста од сите засегнати страни е за пофалба, вели Димовски.
Тој потврди дека е во контакт со сите институции и со сојузниците во НАТО, за претстојот на овие лица да биде во најдобар можен ред.
-Има обиди за сеење страв и за растење на сомнежот, но и ваквите обиди за лажни вести за оваа група од Авганистан не наидуваат на поддршка во јавноста. Граѓаните знаат дека и ние како народ низ историјата сме биле во незавидна ситуација и сме добивале помош, рече Димовски и додаде дека заканите од тероризам и екстремизам се пермаментни во секоја земја, а нивното внимание како институција продолжува.