Државната комисија за спречување на корупцијата (ДКСК) отвори случај за генералниот секретар на Град Скопје, Ѓоко Велковски.
Велковски, покрај функцијата во Градот, ја извршува и функцијата советник во општина Чаир од редовите на ВМРО-ДПМНЕ.
Неодмна СДСМ обвини дека „ВМРО-ДПМНЕ и градоначалничката на град Скопје Данела Арсовска со назначување на Велковски го прекршија законот, поточно член.44 од Законот за спречување на корупција и судир на интереси“.
-Неговата плата во Град Скопје е околу 50.000 денари, и заедно со надоместот како советник Велковски од парите на граѓаните месечно добива околу 68.000 денари. Антикорупциската комисија да постапи по ова очигледно прекршување на законите, случајот да биде расчистен а одговорните да бидат соодветно санкционирани согласно законите, побараа од владеачката партија.