Американските разузнавачки служби предупредија на можна руска воена инвазија на Украина поради тензиите меѓу Москва и Вашингтон. Русија наводно планира голема инвазија која ќе започне на почетокот на следната година, во која ќе бидат вклучени до 175.000 војници, објави Вашингтон пост во петокот вечерта, неколку дена пред видео средбата меѓу американскиот претседател Џозеф Бајден и неговиот руски колега Владимир Путин. Главна тема на разговорот закажан за утре ќе биде критичната ситуација во Украина, но не се знае дали Бајден ќе му ја соопшти оваа информација на Путин.
Документот на американското разузнавање до кој дошол „Вашингтон пост“ содржи сателитски фотографии, кои покажуваат дека Русија планира да концентрира војници на четири локации.
„Русија планира воена офанзива против Украина на почетокот на следната година, чија големина би била двојно поголема од она што беше забележано за време на руската вонредна воена вежба пролетта оваа година во близина на границата со Украина. Планот подразбира ангажирање на 100 баталјонски тактички групи со околу 175.000 војници“, тврди разузнавачки извор познат на американскиот весник.
Според украинските проценки, во близина на границата има 94.000 руски војници, додека според американските податоци има 70.000 руски војници. Разузнавањето открива план за движење на војниците, со цел „да се сокријат вистинските намери и да се предизвика неизвесност“. Фотографиите направени од сателити покажуваат дека Русија минатиот месец го зголемила бројот на војници на границата со Украина.
"U.S. intelligence has found the Kremlin is planning a multi-front offensive as soon as early next year involving up to 175,000 troops"
"The plans involve extensive movement of 100 battalion tactical groups with an estimated 175,000 personnel"https://t.co/05B5kC3iLb pic.twitter.com/PD1XMyUYxj— Rob Lee (@RALee85) December 4, 2021
Ентони Блинкен, државниот секретар на Соединетите Американски Држави, неодамна објави дека САД имаат докази дека Русија направила планови за напад на Украина. Сепак, како што истакна Блинкен, не е јасно дали Путин ја донел конечната одлука за почетокот на инвазијата на соседната територија.
Русија негираше каква било намера и ја обвини Украина дека сама собира воени трупи, со цел да создаде илузија на опасност што не постои.
Украинската разузнавачка служба објави и неодамнешна мапа, за која тврди дека е план за напад на Русија.
Според објавената мапа, руските сили се инфилтрираат длабоко во Украина од север, исток и југ. Доколку навистина се случи инвазијата, тоа би била многу покрвава операција од заземањето на Крим во 2014 година, предупредија агентите на украинската служба.
Во соопштението на Белата куќа се вели дека Бајден „ќе ја подвлече американската загриженост за руските воени активности на границата со Украина и ќе ја потврди американската поддршка за суверенитетот и територијалниот интегритет на Украина“ за време на видео-повикот со рускиот претседател.
Бајден во петокот предупреди дека ќе му отежне на Путин да продолжи со плановите за кои се грижат луѓето, а САД и нивните европски сојузници разговараа за воведување санкции кон Русија доколку таа преземе агресивни дејствија.