Ердоган најави построга контрола врз социјалните мрежи

Во телевизиското обраќање, Ердоган рече дека неговата влада е одлучна да воведе закони што ќе ги принудат компаниите за социјални медиуми да воспостават правно присуство во Турција. Условот би значел дека тие можат да бидат финансиски одговорни и принудени да одговорат на одлуките на турскиот суд.

„Дали гледате зошто се спротивставуваме на социјалните мрежи, како што се Јутјуб, Твитер, итн?“, праша Ердоган повикувајќи се на наводните навреди упатени кон членовите на неговото семејство.

„Неопходно е овие канали да се стават под контрола“, рече турскиот претседател.

Министерот за внатрешни работи Сулејман Сојлу изјави дека бројни корисници на социјални мрежи биле приведени во текот на ноќта затоа што наводно на Твитер ја навредувале ќерката на Ердоган, неговиот зет, кој е владин министер надлежен за економијата на земјата и новородениот син на парот.