Претседателот Реџеп Таип Ердоган во средата го обвини италијанскиот премиер Марио Драги за „дрскост и непочитување“, откако го нарече турскиот лидер „диктатор“.
Минатата недела Драги рече дека Ердоган ја понижил претседателката на Европската комисија Урсула фон дер Лејен за време на посетата на Анкара и дека е важно да се биде искрен со „диктаторите“, што резултираше со осуда од Анкара.
Во својот прв јавен коментар за ова прашање, Ердоган на настан во Анкара рече дека Драги ги нарушил односите меѓу Турција и Италија и посочи дека италијанскиот премиер нема демократски легитимитет за вакви критики, објави Ројтерс.
– Изјавата на италијанскиот премиер навистина покажува дрскост и непочитување. Во време кога се надевавме дека врските меѓу Турција и Италија можат да достигнат добра точка, давајќи ја оваа изјава, овој човек по име Драги за жал ги наруши односите меѓу нас, рече Ердоган.
– Дојдовте со именување, не сте избрани. За да можете да давате такви забелешки во врска со Таип Ердоган, прво мора да бидете свесни за сопствената историја. Но, видовме дека тоа не е случај – додаде Ердоган, во очигледна референца за фашистичкиот диктатор Бенито Мусолини.
Драги, поранешниот претседател на Европската централна банка, не дојде на власт на избори, туку италијанскиот претседател го постави на чело на новата влада во февруари, откако претходната коалиција пропадна поради партиски расправии.