На земјите-членки на ЕУ им е кажано дека Унијата има законско овластување привремено да користи најмалку 33,8 милијарди евра од замрзнатите средства на руската централна банка за да помогне во обновата на Украина, објави денеска Блумберг, повикувајќи се на неименувани извори.
Тие извори рекоа дека Правната служба на Советот на ЕУ им кажала на амбасадорите на Унијата, на разговорите во средата, дека таков план е законски изводлив, доколку имотот не е експроприран и се исполнети одредени услови.
Според овие извори, користењето на замрзнатите средства на руската банка подразбира утврдување на датумот до кој тие ќе бидат искористени за обнова на Украина, обезбедување ликвидни средства, како и фактот дека главницата и каматата мора да бидат вратени во Русија во одреден момент.