Ако ни кажеше некој пред една година дека мачка ќе шета околу бирото на директорот на работен состанок, ќе се смеевме – но 2020 година ги смени правилата на работа.
Многумина од нас сè уште работат од дома поради моменталната состојба, а една неочекувана придобивка е што поминуваме повеќе време со своите миленици.
Всушност, за многумина од нас, домаќините со четири нозе станаа наши најблиски соработници.
Студија на „Cats Protection“ испита околу 700 сопственици на миленичиња кои работат од дома за да дознаат повеќе за овој уникатен работен однос.
Резултатите покажуваат дека 63 проценти рекле дека мачката ги смирила, додека 56 проценти рекле дека се чувствуваат помалку осамени поради нив.
Повеќе од половина (53 проценти) одговориле дека биле сведоци на комични ситуации со своите миленици, како што се одење на лаптопи додека трае работата, што ги насмеало.
И, наместо да разговараат со колегите на пауза, некои дури и се обраќаат на својата мачка, додека четири од десет лица истакнуваат дека „разговарале“ за деловни проблеми со својата мачка.
Но, како домашните миленици точно ни помагаат да работиме од дома?
– Домашните миленици создаваат чувство на нормалност. Постои нешто доста утешно кај животно кое нема идеја за работите што нè стресуваат. Многу е смирувачко да се има таа едноставна перспектива – истакнува психологот Џо Хемингс. Животните живеат за моментот, а нивното дружење е корисен потсетник да го сториме тоа во свет во кој премногу се грижиме за тоа што нè чека утре.
Џо исто така верува дека нашите миленици се посреќни од кога било, сега кога работиме повеќе од дома.
– Домашните миленици го намалуваат нивото на кортизол и адреналин во крвотокот, задржувајќи ја вознемиреноста под контрола – заклучи Џо.
Значи, за сите оние на кои куче или мачка го прекинале повикот на „Зум“, има изговор – миленичињата се наша радост!