Претседателката на Европската комисија, Урсула фон дер Лајен најави нов пакет помош за Украина во вредност од 450 милиони евра и други мерки за поддршка по состанокот на неколку комесари со членовите на украинската влада во Киев.
„Европската унија денеска испраќа многу јасна порака до Украина и пошироко за нашата колективна сила и решителност пред бруталната руска агресија“, се вели во изјавата на Фон дер Лајен.
Од новата финансиска помош, 145 милиони евра се наменети за хуманитарна помош, а 305 милиони евра за санација на оштетената инфраструктура. Оваа објава е последна во серијата ветувања за помош дадени за време на посетата на Фон дер Лајен и 15 други претставници на Комисијата.
Зборувајќи претходно заедно со украинскиот претседател Володимир Зеленски, претседателот на Комисијата рече дека ЕУ ќе и обезбеди на Украина 150 милиони евра за енергетска опрема, како и 35 милиони енергетски ефикасни светилки и 2.400 генератори по повторените руски напади врз енергетската инфраструктура.
Обука и деминирање
Шефот за надворешна политика на ЕУ, Жозеп Борел му рекол на украинскиот премиер Денис Шмихал дека земјите од ЕУ планираат да обучат вкупно 30.000 украински војници, што ја удвојува претходната цел на мисијата за воена обука на ЕУ од 15.000.
Украинските војници ќе добијат специјализирана обука, како и технички инструкции за нова опрема, вклучително и тенкови Леопард 2, објави Борел на Твитер. Борел, исто така, ги сподели плановите со Шмихал да и обезбеди на Украина 25 милиони евра за помош во финансирањето на операциите за деминирање.
„Заштитата на цивилите и нивните средства за живот е приоритет“, напиша тој на Твитер.
Фон дер Лајен рече дека досегашната економска, хуманитарна и воена поддршка на ЕУ за Украина изнесува речиси 50 милијарди евра.
Центар за собирање докази за воени злосторства
Европската комисија, исто така, потпиша договор со украинската влада што и овозможува на земјата да се приближи до единствениот пазар на блокот во иднина. Со цел Русија да биде одговорна за војната против Украина, ќе се формира центар за докази во Хаг, најави и Фон дер Лајен.
Се очекува претседателот на Европскиот совет, Шарл Мишел, во петок да пристигне на средба со Зеленски, на која дополнително ќе разговараат за амбициите на Украина за влез во ЕУ. Украинската влада изрази надеж дека ќе започне формални преговори за членство „што е можно побрзо и успешно“.
Фон дер Лајен го пофали „импресивниот напредок“ на Украина во четвртокот, но пристапувањето е многу сложен и долг процес на правни реформи и усогласување со ЕУ. Поддршката на ЕУ за претходно објавениот план од 10 точки на Зеленски за мир, обнова на Украина и правда за воените злосторства извршени од Русија, исто така, ќе биде на дневен ред во петок.