Седиштето на Европскиот парламент во Стразбур, Франција, привремено ќе стане центар за тестирање на коронавирус, објави претседателот на парламентот, Давид Сасоли.
„Ние сакаме да бидеме со нашиот град домаќин и неговите граѓани за време на ова тешко време“, рече Сасоли преку Твитер.
Се очекува парламентот да одржи седници на Интернет и во помал обем во својот втор дом во Брисел до септември.
Извор во парламентот рече дека дел од седиштето на Стразбур им било ставено на располагање на француските власти за тест центар, со кревети и просторија за консултации.
Парламентот, исто така, ќе понуди дел од својата флота за транспорт на медицински персонал, изјави извор.
Градоначалникот на Стразбур, Роланд Рис, рече дека е „длабоко погоден“ од овој чин.
„Оваа одлука е исто така симбол на взаемната помош што европските земји мора да ја изразат во борбата против коронавирусот“, се вели во соопштението на Рис.
Источниот француски регион Алзас, во кој се наоѓа Стразбур, заедно со регионот Иле де Франс околу Париз, е најтешко погоден од КОВИД-19, предизвикан од новиот коронавирус.
Во поширокиот регион во источна Франција, беше пријавено скоро една четвртина од смртните случаи на КОВИД-19 кај хоспитализирани пациенти во таа земја.
Некои пациенти од источна Франција биле пренесени во други француски региони и Германија, Луксембург и Швајцарија на лекување.