Во 2014 и 2015 година, Фејсбук отпушти 52 вработени за злоупотреба на пристап до податоци од корисници на социјална мрежа. Меѓу отпуштените лица за шпионирање на корисници имало и мажи кои го злоупотребиле пристапот до информации за жените што ги привлекувале.
Користејќи го нивниот пристап до корисничките податоци во внатрешните системи на Фејсбук, инженерите можеле да ги видат локациите на жените, приватните пораки, избришаните фотографии и повеќе, објави „Телеграф“.
Во еден опишан случај, инженер на Фејсбук бил на одмор со жена во Европа кога двајцата се скарале по што таа решила остатокот од годишниот одмор да го помине сама. Користејќи можност за пристап до податоци од Фејсбук, тој наводно ја следел и ја нашол во хотелот каде што престојувала и повторно се судрил со неа.
Во друг случај, инженер на Фејсбук, наводно, злоупотребил пристап до податоци на Фејсбук, откако дознал дека жената во која бил за заљубен редовно го посетува паркот Долорес во Сан Франциско и ги користел овие информации за да отиде таму и да ја најде.
Повеќето од инженерите кои злоупотребиле приватни податоци биле мажи кои барале жени што ги привлекувале, но не ги сретнале лично, се вели во извештајот, што е извадок од книгата што допрва треба да се објави, потпишана од двајца новинари на „Њујорк Тајмс“.
Додека 52 работници беа отпуштени за такви прекршоци во 2014 и 2015 година, тогашниот директор за безбедност на Фејсбук, Алекс Стамос, наводно, предупредил дека стотици други слични прекршоци можат да останат незабележани.
Основачот на Фејсбук, Марк Закерберг, наводно бил вознемирен кога дознал за широко распространетата злоупотреба на корисничките податоци и прашал зошто никој во компанијата не размислува да ги заостри правилата за пристап до таквите податоци.
Но, самиот Закерберг го дизајнираше системот за пристап до податоци на компанијата и одби да го промени со зголемувањето на компанијата, се вели во извештајот.
„Отсекогаш сме имале нулта толеранција за злоупотреба и го отпуштивме секој вработен за кој се покажа дека несоодветно пристапил до податоците“, рече портпаролот на Фејсбук.
„Од 2015 година ги зајакнуваме протоколите за обука на вработените, откривање и спречување злоупотреби. Ние, исто така, продолжуваме да ја намалуваме потребата од инженери за пристап до одредени типови на податоци додека работат на развој и поддршка на нашите услуги“.