Со оглед на тоа дека се крена прашина во јавноста, за прославата на ДУИ во просториите на Министерството за политички систем и односи помеѓу заедниците, на денешната прес конференција, претседателката на инспекцискиот совет, Магдалена Филиповска Грашкоска, посочи дека сите инспекторати постапуват неселективно и дека сите наводи за прекршување на протоколите ќе бидат проверени.
Од друга страна, директорката на Државниот санитарен и здравствен инспекторат, Ирина Бухова ја префрли топката и потенцираше дека истите наводи се одговорност односно надлежност на трудовиот инспекторат.
За потсетување, по настанот на ДУИ и партискиот собир, министерот за надворешни работи, Бујар Османи посочи дека немало никакви прослава ниту пак прекршување на протоколите, додека Артан Груби, инаку прв вицепремиер и министер за политички систем и односи со заедниците, потенцираше дека фотографијата без маски е само еден миг, во којшто се одбележало изненадувањето наменето за претседателот на партијата, Али Ахмети.