Претседателката на Европската комисија, Урсула Фон дер Лајен, денеска во Тирана оцени дека ситуацијата на северот на Косово и Метохија е „многу загрижувачка“ и ги повика Белград и Приштина да ги намалат тензиите и да се вратат на дијалог, пренесува приштинска „Економија онлајн“.
„Зголемените тензии меѓу Косово и Србија се загрижувачки и потребно е да се намалат тензиите и да се врати на дијалог“, рече Фон дер Лајен на заедничката прес-конференција во Тирана со албанскиот премиер Еди Рама.
Таа нагласи дека ЕУ е „изградена врз основа на дијалог“, а потоа врз основа на економскиот развој.
„Ова е долг процес што носи иднина на мир и просперитет“, рече Фон дер Лајен, честитајќи ѝ на Албанија за, како што рече, напредокот што го постигнала во судските реформи.
Претседателката на Европската комисија денеска ја започна својата посета на Западен Балкан во Тирана, а утре во Белград треба да се сретне со претседателот на Србија, Александар Вучиќ.
Во четвртокот е најавена средба со српската премиерка Ана Брнабиќ.