Претседателот на Европската комисија Урсула фон дер Лајен и претседателот на Европскиот совет, Шарл Мишел се состанаа денес за првпат од минатонеделниот инцидент со протоколот во Анкара. Фон дер Лајен и Мишел одржуваат редовни состаноци еднаш неделно, а денешната средба предизвика посебно внимание поради инцидентот што се случи во Анкара минатиот вторник, пренесува Хина.
Турскиот претседател Реџеп Таип Ердоган во тоа време ги прими Фон дер Лајен и Мишел, а на состанокот на Мишел му беше дадена маса веднаш до Ердоган, додека Фон дер Лајен мораше да седи на блискиот кауч на страна, додека спроти неа на другиот кауч беше турскиот министер за надворешни работи.
Инцидентот медиумите го нарекоа „софагејт“, а според извори од Комисијата, Урсула фон дер Лајан изјавила дека нема да дозволи да се повтори слична ситуација.
Портпаролот на ЕК рече дека денешниот состанок меѓу претседателот на ЕК и Мишел е нормален неделен состанок, на кој тие „разговарале за голем број актуелни теми“.
Хина додава дека постои несогласување меѓу двете институции за тоа кој ја претставува Европската унија во странство според протоколот.
Европскиот совет тврди дека Мишел, како претседател, има предност во протоколот, со кој не се согласуваат во Европската комисија и велат дека и двајцата треба да имаат ист третман.