Партијата Алтернатива синоќа информираше дека нејзиниот лидер Африм Гаши остварил средба со американската амбасадорка во земјава, Анџела Прајс Агелер.
Според објавата на социјалните мрежи, Гаши ѝ ја претставил иницијативата за поднесување уставен амандман за спречување на неказнивност на политичка корупција.
-Претседателот Гаши за овој амандман ја побара американската поддршка, бидејќи е еден од најголемите чекори предложени досега, со директна цел – борба против политичката корупција. Оваа иницијатива мора да го надмине етничкиот дискурс и да се фокусира на владеењето на правото како приоритет за целото општество, велат од владеачката партија.
Тој посочил дека со амбасадорката се согласиле дека ја делат истата визија за иднината на земјата.
-Ја реафирмиравме заедничката заложба земјата да оди напред кон ЕУ и европските стандарди во општеството, како што е владеењето на правото.
Разговаравме за плановите за забрзување на интеграцијата во ЕУ, вклучително и опциите за деблокирање на преговорите со ЕУ, преку уставните измени. Исто така, се согласивме дека сите политички фактори треба да го поддржат патот кон ЕУ и да ги стават граѓаните на прво место, во обид да обезбедат подобра иднина за сите, објави Гаши на својот профил на Фејсбук.