Руската влада му дозволи на „Газпром“, преку својата подружница „Газпром Нефт“, да формира своја приватна армија, се вели во документот објавен пред неколку дена на рускиот правен портал. Нафтената компанија ќе има удел од 70 отсто во структурата на новата воена организација, а преостанатиот удел ќе биде во рацете на „Приватната безбедносна организација „Стаф – Центар“.
Основа за создавање на организацијата е Законот за заштита на енергетскиот сектор на Русија, станува јасно од указот потпишан од премиерот на Русија, Михаил Мишустин. Овој закон дозволува создавање на паравоени организации од страна на енергетските компании, доколку нивното учество во капиталот не е помало од 50 проценти.
Една од најпознатите приватни воени компании во Русија е ПВЦ „Вагнер“ на рускиот бизнисмен Евгениј Пригожин. Организацијата зема активно учество во различни воени операции на Москва, вклучително и сега во Украина. Според набљудувачите, нападот на руската армија во Донбас во последните недели се должи на платениците на Пригожин, но постепено тој беше заменет со мобилизирана и редовна руска армија.
На 6 февруари, Врховната Рада на Украина го пи прогласи ПМЦ „Вагнер“ како криминална организација. На крајот на јануари, американското Министерство за финансии ја прогласи за „значајна организација за прекуграничен криминал“ и воведе голем број санкции против неа.
Европските пратеници побараа на крајот на 2022 година таа да биде ставена на листата на терористички организации во Европа.