Германски експерт: Може ли успешен спортист да биде веган?

од Nikola Popovski

Се сеќаваме колку Новак Ѓоковиќ го критикуваа дека не јаде месо и како молчеа кога тој сепак постигна успех на терените. Новак, се разбира, не е единствениот спортист кој преминал на диета од растителна основа, иако добар дел од јавноста смета дека не можете да постигнете целосна физичка форма ако само ја „пасете трева“. Инго Фробоз, професор на германскиот спортски универзитет во Келн, директор на Здравствениот дом и автор на бројни книги за здравје, исхрана и спорт, реши да го разбие тој мит.

„Секако дека можеш. Не зависи од диетата што ја одржувате. Ако квалитетот и квантитетот на хранливи материи, витални состојки и енергија се соодветни, апсолутно е можно да се постигнат врвни спортски резултати со веганска диета“, изјави Фробоз за „Спектар“.

Неговата препорака е урамнотежена исхрана, која дава многу можности. „Урамнотежената исхрана може да биде и веганска. Но, таа не е нужно поздрава или поефикасна. Едноставно е поинаку “.

Според него, веганите кои сериозно се занимаваат со спорт треба да обрнат посебно внимание на внесувањето витамин Б12 и протеини.

„Со месото е многу полесно отколку со зеленчукот. Внесот на протеини често им создава проблеми на веганите. Се претпоставува дека на врвен спортист му требаат околу два грама протеини на килограм телесна тежина на ден. Маж со тежина од 80 килограми би требало да внесе 160 грама чист протеин на ден. Исклучително е тешко да се добие ова само од мешунките, бидејќи тие имаат само околу 25 проценти протеини. На тој начин, некој ќе мора да јаде огромна количина леќа или леблебија за да ги покрие своите потреби “, објаснува Фробоз.

Наместо мешунки, тој препорачува тофу, производи од соја, како и житарки како извор на протеини.

„Исто така е важно е да биде разновидно. Оброк со висок квалитет ги содржи сите осум есенцијални аминокиселини. Ова не е лесно без храна од животинско потекло… Урамнотежената веганска исхрана е малку понапорна и треба многу повнимателно да пристапите кон темата храна – особено како спортист. Јајцата би биле алтернатива и за вегетаријанците, тие се еден од најдобрите извори на протеини за спортистите“, посочува Фробоз, кој се декларира себеси како„ флекситаријанец“.

„Тоа значи дека јас претежно јадам вегетаријанска храна, но повремено и месо или риба. Храната е повеќе од потребна, таа е и култура и уживање. Мојот рецепт е: јадење и вежбање – и едното и другото треба да го правите правилно. Вежбам шестпати неделно, трчам и возам велосипед. Но, јас никогаш не вежбам само за да согорувам калории. Мора да биде забавно“, вели професорот.

loading...

Слични содржини