Да се врати Титовата порака за солидарност на ѕидот на Музејот на град Скопје, бараат граѓаните, чија иницијатива заживеа и на Фејсбук. Според нив, пораката не е обична, таа има културолошка и едукативна вредност, а солидарноста како концепт е нешто што секое здраво општество го негува.

„Тоа не е обична порака. Тоа е едно ветување дека ќе се изгради поубав град, со солидарна помош. Тоа ние го направивме, односно го добивме. И како гест на респект, на извонредна почит кон тој момент и тој период. И воопшто кон феноменот на солидарност. Едноставно тој концепт, е нешто што секое здраво општество го негува“, вели архитектот Даница Павловска.

Пред 17 години беа извадени буквите од стиропор, а пораката се читаше од отисоците на лепилото за букви. Но, по 7 години и бронзените табли со пораката беа целосно извадени, со образложение дека салата затворена со нив, ќе се реновира. Идеолошки разлики на претходната власт со поранешното социјалистичко уредување , беа причина пораката да се тргне од ѕидот, смета актуелната в.д. директорка на Музејот на Град Скопје. Според неа, иницијативата за враќање на Титовата порака за солидарност, е во процедура.

„ Зградата на Музејот на град Скопје, е споменик на културата. Значи, за сите можни интервенции на неа и околу неа, се добива одобрување од Конзерваторскиот центар и од Управата за заштита на спомениците. Јас можам да речам дека првично се обратив до Конзерваторскиот центар. Претпоставката е дека нема да има проблем“, изјави Фросина Зафировска- в.д. директорка на Музејот на град Скопје.

Од Град Скопје, кој е надлежен за Музејот , велат дека позитивно ќе одговорат на барањето.

„Барањето е ставено во процедура. Предвидено е во претстојниот период, кога ќе започне одбележувањето на 55 годишнината од Скопскиот земјотрес, на еден од настаните да бидат откриени старо -новите букви од пораката на Тито“, соопштија од Град Скопје.

А, се јавија и од Министерството за култура.
„ Кој ги извадил буквите, тој треба да ги врати назад“ е ставот на министерството.

Доколку барањето помине кај сите надлежни , ќе следува период за решавање на новиот изглед на пораката и за изборот на материјал, од кој ќе бидат направени буквите.

Извор: Телма