Српските цариници на преминот Прохор Пчињски со Македонија заплениле 70 оригинални парфеми од светски брендови, кои тројца грузиски државјани се обиделе да ги прошверцуваат, соопштено е денеска од српската Царина.
Во автомобил со француски регистарски таблички се пронајдени парфеми од марките „Гучи“, „Шанел“, „Прада“, „Блгари“ и „Бјурбери“ во вкупна вредност од околу 5.500 евра.
Грузијците прво им кажале на цариниците дека имаат само личен багаж, но кога биле пронајдени парфемите изјавиле дека се наменети како подароци на семејството и пријателите во Грузија.
Парфемите се привремено задржани до завршување на прекршочната постапка.
-Патниците можат да носат еден парфем и тоалетна вода како дел од личниот багаж, а повеќе од тоа мора да пријават, соопшти српската Царинска управа.