Менаџерот на Манчестер Сити, Пеп Гвардиола беше задоволен по натпреварот против Ливерпул, кој неговиот тим го доби со убедливи 4:1 на „Енфилд“.
Манчестер Сити чекаше 18 години да триумфира на стадионот на Ливерул, а тоа го стори во стил по двата гола на Илкај Гундоган и по еден гол на Рахим Стерлинг и Фил Фоден.
Гундоган промаши пенал во 37. минута при резултат 0: 0.
„Граѓаните“ стигнаа до десеттата врзана победа во Премиер лигата, и 14 по ред во сите натпреварувања, па Гвардиола го пофали својот тим.
„Се надевам дека следниот пат ќе можеме да победиме овде во присуство на публика. Секогаш е посебно да се игра на „Енфилд“, но со публиката е на друго ниво. Голема победа за нас. На крајот од денот тоа се три бода, но го земам предвид фактот дека победивме по промашен пенал и примен гол. Начинот на кој реагиравме на тоа направи разлика“, рече Гвардиола.
Шпанскиот стручњак ја пофали играта на Фил Фоден, кој постигна гол и забележа асистенција.
„Тој е голем талент. Тој одлично ја контролира топката, агресивен е и кога игра на страна му е многу полесно. Тој е сè уште многу млад и има уште простор за подобрување “, изјави Гвардиола.