Хрватската полиција идентификуваше малолетник од Славонски Брод како сторител на хакерскиот упад во мобилната компанија А1 и изврши кражба на лични податоци на најмалку 100.000 корисници на тој оператор.
Според „Индекс“, хакерот кој упаднал во А1, украл лични податоци и барал околу половина милион долари во криптовалути е стар помалку од 15 години.
Полицијата го класифицира сторителот во категоријата малолетник, што е поим што вклучува тинејџери од 14 до 16 години.
Полицијата вчера наводно го чекала кога се вратил од училиште, а дејствувале во присуство на неговите родители. Тие ја пребарале семејната куќа каде, според пишувањата на медиумите, ја нашле опремата со која е извршено делото.
Бидејќи е малолетник, полицијата не излезе со подетални информации за него.
Имал помошник
По тој повод се одржа прес-конференција на хрватското МВР.
„Втор ден спроведуваме интензивна кривична истрага против малолетно лице кое живее во Бродско-Посавинската жупанија поради сомнение дека сторил кривично дело оштетување и злоупотреба на компјутерски податоци“, изјави Ренато Гргуриќ, раководител на секторот за сајбер безбедност.
„Ова е малолетно лице, повеќе нема да излегуваме со детали од истрагата“, додаде тој.
„Без разлика што е малолетник, во овој момент веќе можам да потврдам дека има доволно докази кои укажуваат на тоа дека тој е сторител на тоа дело. Кога ќе заврши истрагата, ќе биде поднесена соодветна кривична пријава“, кажа Гргуриќ.
Полицијата соопшти дека малолетниот хакер имал помошник. Станува збор за лице кое не е од Хрватска, но беше истакнато дека помагачот не учествувал во извршувањето на делото хакерски упад.
„Во врска со извршувањето на ова кривично дело е приведено уште едно лице кое не е од Хрватска. Во моментов се утврдува идентитетот на тоа лице“, соопштија од полицијата.