Според многумина, најдобрата серија филмови за Бетмен ја режираше Кристофер Нолан, а беше отворена во 2008 година со филмот „Мрачниот витез“. Во овој филм, Бетмен, кој го игра актерот Кристијан Бејл, возеше атрактивен „тенк“ со прекар The Tumbler – вселенски дизајниран Бетмобил со променлива надворешност. Се разбира, пред 14 години немаше збор за еколошки погон што може да си го дозволи еден богат човек и љубител на технологијата како Брус Вејн – но сега еден виетнамски студент по архитектура ја пополни празнината.
Неговото име е Нгујен Дак Чунг, има 23 години и во последните две работел на верна реплика на овој Бетмобил во природна големина. Тоа е првиот целосно електричен Бетмобил во природна големина што некогаш е направен, и како што се очекуваше – тој е побрз и поеколошки од филмската верзија на Нолан.
Станува збор за целосно функционално електрично возило долго 3,6 метри и широко 2,6 метри, а високо е 1,5 метри. Вкупната тежина на возилото е околу 600 килограми, бидејќи е направено од панели направени од 3D печатена ABS пластика, карбонски влакна и други композити, поставени околу челична цевчеста структура. Возилото има и литиум-јонски батерии (со непознат капацитет), кои придвижуваат електричен мотор (необјавена моќност). Но, она што го знаеме е дека максималната брзина на Бетмобилот е 104 км/ч и дека може да прими две лица – Бетмен и Робин, претпоставуваме.
Хидрауличната врата се отвора, како што личи, на далечински управувач, а од дополнителната опрема авторот посочува 4 тактички камери кои ја снимаат сцената околу возилото во 360 °. Покрај тоа што навремено ги забележуваат негативците, тие наводно се корисни и при маневрирање, особено при совладување на остри кривини. Видливоста од кабината, се чини, не е голема.
Уникатниот електричен Бетмобил моментално е изложен во галеријата Ван Дарил во најголемиот виетнамски град Хо Ши Мин Сити (познат и како Сајгон). Таму можете да го видите на барање, но и да разговарате за можно купување, иако цената не е нагласена.