Најмалку осум туристи, меѓу кои и едно дете, загинаа, а повеќе од 20 се ранети во артилериски напади во северен Ирак, соопштија во средата ирачката армија, здравствените власти и локалната курдска влада. Ирак ја обвинува Турција за нападот, додека турскиот министер за надворешни работи негира и изјави дека Истанбул е подготвен да помогне во истрагата.
Најмалку четири артилериски гранати го погодиле одморалиштето Барак во автономниот регион во Ирак, под контрола на Курдите, изјави за „Асошиејтед прес“ функционерот на областа Захо, Мушир Мохамед. Сите жртви се ирачки државјани.
Ирачката армија соопшти дека во нападот загинале осум лица, додека здравствените работници во болницата во провинцијата Дохук, каде се сместени ранетите, соопштија дека девет лица се мртви.
Еден од ранетите, турист од Багдад, изјави дека многу туристички групи биле на одмор во областа во моментот на нападот.
Владата во Багдад го осуди нападот, нарекувајќи го „директно кршење на суверенитетот на Ирак“. Смртта на цивили предизвика гнев кај Ирачаните, кои организираа протест пред турската амбасада во Багдад, каде беа запалени турски знамиња.
Турција ги отфрла обвинувањата
Турскиот министер за надворешни работи Мевлут Чавушоглу ги отфрли обвинувањата дека неговата земја извршила артилериски напад врз туристи во северен Ирак и во интервју за турската државна телевизија ТРТ изјави дека Турција е подготвена да соработува со ирачките власти во истрагата за „подмолниот напад“.
„Според информациите што ги добивме од армијата, Турција не нападнала цивили. Нашата борба во Ирак отсекогаш била против теоретската Курдистанска работничка партија“, рече Чавушоглу.
Стотици туристи од југот на земјата доаѓаат во курдскиот регион на северот на Ирак во текот на летните месеци, бидејќи времето е релативно посвежо.