Италија ги отвора границите за да ја спаси туристичката индустрија

од Nikola Popovski

Италија ги отвора своите граници за европските туристи од среда, еден месец откако постепено започна со олеснување на рестриктивните мерки и се надева дека ќе ја спаси туристичката индустрија, една од клучните сектори во земјата погодена од пандемијата на коронавирус.

Гондолите повторно ќе започнат со пловење низ венецијанските канали, а од понеделник и римскиот Колосеум и музеите на Ватикан повторно ќе примаат посетители. Но, хотелиерите и угостителите сè уште стравуваат дека Италија нема да биде првиот избор за туристите оваа година, бидејќи земјата е една од најпогодените од пандемијата на коронавирус во Европа, со повеќе од 33.500 смртни случаи.

Рестораните и кафулињата полека почнаа да се отвораат во последните две недели, но само 40 од 1.200 хотели во Рим започнаа да примаат гости, објави во понеделникот весникот „Кориере дела Сера“. Само десетина хотели се отвориле во Милано, а нивните сопственици велат дека е премногу скапо да ги отворите ако останат празни.

Од среда, владата дозволила и слободно патување меѓу италијанските региони, но останува забраната за големи собири и обврската за носење маски во затворен простор и во јавниот превоз.

Оние што ќе влезат во Италија од среда нема да мора да поминат во две недели изолација. Меѓународните летови продолжуваат во среда во само три града – Милано, Рим и Неапол, а владата се плаши од оние кои редовно доаѓаат во земјата со автомобил, воз или траект ќе изберат други дестинации.

Швајцарија ги предупреди граѓаните кои патуваат во Италија дека ќе се соочат со епидемиолошки мерки при нивното враќање. Таа земја ги отвора своите граници со Германија, Франција и Австрија на 15 јуни, но не и со Италија. На истиот датум, Австрија ќе ги отвори своите граници со Германија, Швајцарија, Чешка, Словачка и Унгарија, но ниту таа нема да ја отвори со Италија.

Според словенечките медиуми повикувајќи се на италијанската „Анса“, Австрија веројатно ќе одлучи да ја отвори границата со Словенија кон средината на месецот. Поради ваквите одлуки поврзани со Италија, тамошниот министер за надворешни работи рече дека неговата земја се третира како „заразна“. Луиџи ди Мајо најави дека ќе патува во Германија, Словенија и Грција оваа недела за да ги увери дека Италија е безбедна за туристите.

Тој треба да се сретне и со францускиот колега Жан-Ив Ле Дријан во среда. Италијанската туристичка агенција соопштила дека околу 40 проценти од Италијанците обично одат на одмор во странство, но годинава би можеле да одлучат да останат дома, што ќе му помогне на локалниот туризам.

Слични содржини