Италија ќе обезбеди стотици милиони евра како поддршка на производителот на автомобили Stellantis за изградба на фабрика за батерии во јужна Италија, изјави министерот за индустрија Џанкарло Џорџети, цитиран од Ројтерс.
„Убедени сме дека Stellantis мора да продолжи да работи во Италија, а џиновската фабрика во Термоли, која (Рим) ќе ја поддржи со 369 милиони евра, ги покажува нашите намери“, изјави Џорџети за дневниот весник „Il Sole 24 Ore“.
Според него, италијанската влада најверојатно ќе одобри пакет од 1 милијарда евра годишно во петок – за најмалку три години – со цел да се стимулира купувањето возила со ниски емисии и доопремувањето на погоните за производство на електрични возила.
Stellantis истакнува дека стратегијата на компанијата ќе биде поддржана од пет фабрики за батерии во Европа и Северна Америка.
Тригодишниот владин план вклучува стимулации и финансиска поддршка за повторно опремување на погоните и нивна подготовка за производство на поеколошки модели, рече Џорџети.
Договорот меѓу Рим и Stellantis сè уште не е конечен, но во интервјуто во неделата, Џорџети рече дека наскоро ќе биде потпишан договор за идната фабрика за батерии.
Stellantis, која управува околу десетина фабрики во Италија, е особено тешко погодена од пандемијата на коронавирус и недостигот на компоненти.
Иако новите мерки имаат за цел да го пренасочат италијанското производство на автомобили на електрични возила, Рим сепак ќе го поддржи производството на некои бензински, дизел и хибридни автомобили.
„Да се поддржи само електричниот сегмент значи да им се направи услуга на странските производители на автомобили“, изјави Џорџети за „Il Sole 24 Ore“. „Исто така, треба да поттикнеме купување поевтини возила од помалку богати луѓе“, додаде тој.
Италија заостанува во производството на електрични автомобили бидејќи владата лобира во Европската унија (ЕУ) да ја укине забраната за продажба на автомобили со мотори со внатрешно согорување во обид да ги поддржи локалните суперавтомобили Ferrari и Lamborghini, кои остануваат во голема мера зависни од фосилни горива.
Автомобилската индустрија во Европа се соочува со невидена серија месечни падови на регистрациите на нови автомобили поради континуираниот недостиг на компоненти. Продажбата на нови автомобили падна за 2,4 отсто во јануари на 822.423 возила, според Европската асоцијација на производители на автомобили (ACEA).