Јанша ги претстави приоритетите на Словенија за време на нејзиното претседателство со ЕУ

од Nikola Popovski

Премиерот на Словенија, Јанез Јанша, чија земја го презеде ротирачкото претседателство со Советот на Европската унија од Португалија на 1 јули, ги претстави приоритетите за следните шест месеци.

Обраќајќи се пред Европскиот парламент во Стразбур, Франција, Јанша зборуваше за програмата за активности за време на шестмесечното претседателство на Словенија со ЕУ.

Јанша рече дека во следните шест месеци е време ЕУ да работи од повеќе стратешка и долгорочна перспектива.

– За втората половина на годината, можам да кажам дека се соочуваме со одредени предизвици и приоритети што произлегуваат од ситуацијата во која се наоѓа во моментов Европската унија – рече тој.

Во исто време, додава Јанша, верува дека предизвиците ќе придонесат за опстанок и развој на Европската унија.

– Пред сè, треба да се фокусираме на отпорноста, заздравување на ЕУ и воспоставување стратешка автономија на унијата – додаде словенечкиот премиер.

Тој исто така посочи дека закрепнувањето ќе дојде истовремено со дигиталната и зелената транзиција.

– Следниот приоритет е унијата на европскиот начин на живот и владеењето на правото, како и еднакви критериуми и мерки за сите земји и граѓани на Европската унија – објасни Јанша.

Тој додаде дека се зборува и за унија на еднакви права и одговорности, унија каде се нуди висок степен на заштита на човековите права, основните слободи, вклучително и слободата на изразување.

– Треба да се фокусираме на создавање сигурна и безбедна Европска унија, која е во состојба да обезбеди сигурност, не само во рамките на нејзината територија, туку и во соседството – нагласи Јанша.

Осврнувајќи се на надворешната политика, Јанша рече дека ќе се фокусира и на односите ЕУ-Западен Балкан. Тој потсети дека Словенија ќе биде домаќин на самитот на ЕУ и земјите од Западен Балкан во октомври.

Укажувајќи на тешкотиите во проширувањето на ЕУ, тој рече дека тие имаат за цел да ја оживеат перспективата на ЕУ за земјите од Западен Балкан.

– Ако не преземеме чекори кон Западен Балкан, тие чекори ќе ги преземе некој што има различни интереси и вредности – рече Јанша.

Истакнувајќи ја потребата да се дефинираат долгорочните односи меѓу Турција и Русија со ЕУ, Јанша рече дека Турција станува еден од најважните актери на Медитеранот.

Словенија, која е членка на ЕУ од 2004 година, ќе претседава со Советот на ЕУ до 31 декември.

Слични содржини