Премиерот на Косово, Авдулах Хоти, најави дека „пречките за продолжување на дијалогот меѓу Белград и Приштина“ ќе бидат отстранети „многу наскоро“, и дека започнувањето на разговорите може да се очекува брзо – веднаш штом се отстранат мерките за движење, сообраќај и патување.
„Мерките што го спречуваат процесот за дијалог од страна на Косово ќе бидат укинати многу скоро. Очекувам дека врз основа на обврските што ги имаме кон нашите меѓународни партнери, ќе ги отстраниме сите пречки во овој процес и ќе седнеме на маса“, рече Авдулах Хоти за Гласот на Америка на албански јазик.
На прашањето дали тоа ќе биде овој месец, Хоти одговори: „Верувам во тоа, многу скоро, многу скоро“.
Тој додава дека процесот на дијалог е добро врамен и дека Приштина во него влегува „за да склучи договор со Србија“.
„Ова треба да резултира со конечно признавање, затоа што веќе неколку години водиме дијалог за теми што се по технички, можеби за да се нормализираат односите меѓу двете земји. Сега мора да седнеме и да склучиме договор, затоа што дури тогаш тоа има смисла, да доведе до взаемно признавање”. рече Хоти.
Тој повтори дека дијалогот го води владата и дека товарот за водење на овој процес паѓа на премиерот, според Уставот.
„Ќе имам координативен пристап да ги вклучам сите во овој процес. Но, секако, товарот ќе биде на владата. Сите парламентарни партии треба да бидат вклучени во овој процес“, рече Хоти, додавајќи дека не очекува проблеми со претседателот Хашим Тачи во разговорите.
Хоти исто така очекува Белград да ги отстрани пречките од своја страна и да размисли пред се на кампањата за повлекување на признавањето на Косово.
„Ако дијалогот не успее на крајот, ние секако го задржуваме правото на државата, согласно Уставот и важечките закони, да ги наметне сите реципрочни мерки кон Србија доколку е потребно. Но, она што е важно во овие мерки е дека тие можат да успеат само ако се усогласени со нашите меѓународни партнери“.
„Ние сакаме да постигнеме конечен договор со Србија за взаемно признавање засновано врз Уставот на земјата, целосно и без разговори за територијалниот интегритет на земјата“, подвлече Хоти.