Руски војници се повлекуваат од своите позиции во јужниот украински регион Запорожје, тврди Киев. Руските единици ги напуштија населбите Михајливка, Полохи и Иженерне, сите јужно од градот Запорожје, објави Генералштабот на украинската армија во своето секојдневно ажурирање.
Тие додаваат дека Кремљ подготвува и евакуација на „персоналот на окупационите администрации“ во регионот. Ваквиот развој на настаните доаѓа откако руската армија започна попис на населението во некои делови од окупираната територија во областа Запорожје, според прогонетиот украински градоначалник на Мелитопол.
„Последниве неколку дена Русите беа во хаос. Прво ги изнесоа ранетите од болница. Потоа започнаа попис на населението во градовите Михајливка и Бурчак за наводно да се подготват за евакуација“, рече Иван Федоров на националната телевизија. Украинската армија објави и дека окупаторските власти спроведуваат попис на населението во Бурчак.
Американскиот институт за проучување на војната истакнува дека руските војници дополнително се повлекуваат од линијата на фронтот во Запорожје со цел да го намалат влијанието на се почестите украински напади врз рускиот персонал и опрема. Во него се наведува дека руските сили се повлекуваат во Мирне, Токмак, Инженерне, Полохија, Јасна и Кински Роздорија во областа Запорожје по украинските напади.
„Руските потези во областа Запорожје може да сугерираат дека руските сили не се во можност да ги одбранат критичните области во услови на се почести украински напади“.
Потенцијалното повлекување од Полохи е особено значајно затоа што населбата се наоѓа на критична патна раскрсница и веројатно ќе биде потешко за руските сили да го одбранат Токмак од потенцијалните украински операции без контрола на таа раскрсница. Повлекувањето од клучната позиција може да значи дека руските сили не можат да ја бранат целата линија на фронтот во регионот Запорожје.
„Сепак, подеднакво е веројатно руските сили да ја преориентираат својата групација во областа Запорожје за да можат да префрлат различен персонал назад во тие населби“, пишува ISW.