Кинескиот амбасадор во ОН изјави дека американскиот претседател Доналд Трамп „шири политички вирус“ во денешниот говор на почетокот на годишното заседание на Генералното собрание на ОН, упатувајќи „неосновани обвинувања“ кон Пекинг, заради начинот на кој Кина управува со епидемијата на коронавирус.
„Во време кога меѓународната заедница навистина се бори против КОВИД-19, Соединетите Американски држави го шират политичкиот вирус овде во Генералното собрание“, изјави пред новинарите амбасадорот Џанг Џун.
Во снимен говор, претседателот на САД ја обвини Кина за „ширење на чумата низ целиот свет“ – коронавирусот.
„Кина цврсто ги отфрла и се спротивставува на овие неосновани обвинувања изнесени против неа од страна на САД“, рече кинескиот амбасадор.
„Американската бучава е некомпатибилна со атмосферата на Генералното собрание“, додаде тој.
Амбасадорот рече дека американскиот претседател „ја злоупотребува платформата на ОН за да предизвика конфронтација“ и со тоа ја „ослабува“ таа светска организација.