Сега е речиси целосно јасно кои ќе бидат кандидатите за нов лидер на британската конзервативна партија и следен премиер на земјата. Во четвртокот, Борис Џонсон поднесе оставка како лидер на партијата, но ќе остане на функцијата премиер додека не се избере наследник.
Двајца поранешни министри за здравство се последните имиња на веќе долгата листа на кандидати. Тоа се Саџид Џавид и Џереми Хант.
Секој претендент наоѓа свој начин да ја објави својата кандидатура.
Џавид и Хант го истакнаа ова во написите во весникот Сандеј Телеграф. И двајцата бараат намалување на даноците. Џавид зборува за укинување на порастот на Националното осигурување, а Хант сака да му помогне на бизнисот.
Министерот за финансии Надим Захави и министерот за транспорт Грант Шапс се исто така меѓу најновите кандидати. Шапс, инаку, изјавил дека во последните 3 години никогаш не правел заговор против Борис Џонсон, што беше протолкувано како укор до неговите колеги за смена на премиерот од власт.
Но, како што забележуваат британските новинари, во наредните денови може да очекуваме многу „валкани вербални пресметки“ во обидот на кандидатите да стигнат до конечното гласање.
Својата кампања ја најави и министерот за финансии Риши Сунак, кој поднесе оставка во вторникот вечерта.
Сојузниците на министерката за надворешни работи Лиз Трас изјавија дека таа ќе влезе во трката, според „Мејл он Сандеј“.
И Трус и Шапс се незадоволни од Сунак и неговата даночна политика. На списокот се и државниот обвинител Суела Браверман, министерот за рамноправност, Кеми Баденох и претседателот на Комитетот за надворешни работи – Том Тугендат.
Но, министерот за одбрана Бен Валас, кој се смета за еден од водечките кандидати, изјави дека нема да се кандидира.
Распоредот за избор на нов лидер ќе стане јасен на почетокот на следната недела, но дотогаш сигурно ќе има повеќе имиња и повеќе детали за тоа кои ќе бидат приоритетите на секој кандидат.