„Во изминатиот период иницирав разговори за проширување на Европскиот Фронт, со сите политички партии. Не да дадат ми поддршка за мене, не за СДСМ, туку на државата и граѓаните! Тоа беше и сеуште е, до крај, мојот единствен мотив. Понудив задржување и проширување на парламентарното мнозинство заради тие политики и заради ништо друго“ рече премиерот Димитар Ковачевски во неговиот говор во Собранието.
Тој рече дека за него политиката не е математика и збир на позиции, фунцкии и собирање, одземање, множење и делење, туку е одговорност, вредности, принципи и обврски.
„Граѓаните и државата не можат без стабилност, извесност, функционалност, ред и поредок, правец и јасна сегашност и иднина. Јас не смеам да дозволам да направиме ситуација во која граѓаните ќе се будат и живеат дневно во неизвесност, грч и размислувања, дали ќе не биде или не, дали ќе има плати и пензии, струја и храна и дали ќе се движиме кон неред и хаос. Ни на крај памет не ми паѓа да дозволувам таква ситуација! А верувајте ми, таква држава сакаат многу! И од внатре и од надвор! Има луѓе и структури, кои сакаат хаос, затоа што така најлесно функционираат! Научени да крадат, да не работат, да ловат во матно и потоа да бегаат надвор, со пари на странски сметки, со фамилии во странство“ рече Ковачевски.
Премиерот рече дека ВМРО-ДПМНЕ и нивните инструктори од Левица го прават токму тоа, блокираат закони и ставаат кочници на сите страни.
„Понудив соработка за овој прогрес и до македонската опозиција, за национално и државно обединување, на конкретен начин, за побрз и посилен европски прогрес на државата! За заедничко и цврсто задржување и зајакнување на македонскиот национален, јазичен и културен идентитет насекаде! На начин, како што успеавме да го направиме вековниот македонски јазик и историски идентитет рамноправен со сите европски нации, така да продолжиме и понатаму! На тој начин го потпишавме и договорот ФРОНТЕКС за кој не гласавте вие денес“ рече Ковачевски.
Премиерот рече дека македонската опозиција продолжи да стои во деценискиот филм на криминал, борба за фотељи, евтин и опасен популизам и растурање на македонското ткиво.