Курти: Би гласал за обединување со Албанија доколку референдумот се спроведе мирно и демократски

од Vladimir Zorba

Премиерот на Косово, Албин Курти во интервју за онлајн магазинот „Монокл“ изјави дека во иднина ќе гласа за обединување со Албанија, но само доколку таквиот референдум се спроведе на мирен и демократски начин.

Курти изјави и дека централниот дел од идниот сеопфатен договор меѓу Косово и Србија треба да бидат меѓусебно признати.

„Сега имаме меѓусебно незнаење, а мораме да се познаваме. За таа цел, прво можеме да имаме изјава во која ќе се договориме да не се напаѓаме. Исто така, верувам дека ЕУ е важен фактор што може да обезбеди рамка за идниот договор бидејќи тој мора да се заснова на духот на европските вредности, законот и редот, демократизацијата и справувањето со минатото“, рече Курти.

Тој исто така изјави дека мисли оти за траен мир и стабилност во регионот, најбрзиот и најдобриот пат напред е шесте земји од Западен Балкан да се интегрираат во ЕУ одеднаш, објави „Косово онлајн“.

„Некои не сакаат да влезат во НАТО, но Косово ќе сака. Косово и Албанија се две земји, но ние имаме ист јазик и ние сме еден народ. Кога прогласивме независност, ја прогласивме против Србија, а не против Албанија. Од друга страна, има многу граѓани на ЕУ кои имаат двојно државјанство. Мислам дека има многу кои имаат три пасоши и ги охрабрувам да гласаат во сите земји чие државјанство имаат“, рече Курти.

Слични содржини