Специјалниот претставник на ЕУ за дијалог меѓу Белград и Приштина, Мирослав Лајчак денеска разговараше за Западен Балкан со претседателот на Германија, Франк-Валтер Штајнмаер.
„Благодарен сум за уште една можност да се сретнам со германскиот претседател Штајнмаер и да имаме инспиративен разговор за Западен Балкан и пошироко“, напиша Лајчак на Твитер со фотографија од средбата со германскиот претседател во Берлин.
Лајчак синоќа во Берлин разговараше со српскиот претседател Александар Вучиќ и со косовскиот премиер Албин Курти на неформална вечера организирана од германската влада.
Германскиот канцелар Олаф Шолц претходно одвоено се сретна со Курти, Вучиќ и Лајчак.
Во пресрет на вечерата, Вучиќ, Курти и Лајчак разговараа со специјалниот германски пратеник за Западен Балкан, Мануел Сарацин и еден од советниците на Шолц.