По долго време, Милан нема да оди во Торино на стадионот на Јувентус како аутсајдер. Периодот на доминација на „Старата Дама“ во италијанскиот фудбал помина како што се виде во минатата, и може да се види на почетокот на оваа сезона. Од друга страна, „росонерите“ растат и напредуваат во секоја смисла, па во недела ќе имаат убава можност да го искористат позитивниот момент и да забележат добар резултат во Торино.
Дека Јувентус повеќе не е фаворит против Милан, потврдуваат и зборовите на неговата легенда Клаудио Маркизио.
„Милан сега е посилен од Јувентус. Малдини, Масара и Пиоли направија одлична работа за да го обноват тимот кој беше во проблеми со години. Како клуб, Милан заслужи такво враќање, со оглед на неговата богата историја. Почетокот во Лигата на шампионите не беше лесен за нив бидејќи Ливерпул е тежок противник, но убеден сум дека овој тим на Милан ќе направи некои добри работи“, изјави Маркизио.
Што се однесува до неговиот поранешен клуб, популарниот „Принципино“ вели дека е потребно време за да започне нова ера.
„Јувентус е во процес на реконструкција. Сега тие се обидуваат да го достигнат нивото на тимот што го започна циклусот на доминација. Кога се поставуваат темелите за долгорочни проекти, нормално е да има потешкотии на почетокот. Треба да им се даде доверба и време. Сега се создаваат нови лидери и не гледам проблем со идентитетот и карактерот. Клуб како Јувентус мора секогаш да се стреми кон победи. Потребно е само малку повеќе кохезија и трпение“.