Роберт Левандовски повеќе не е играч на Баерн (Минхен), но останува приврзан за тимот и градот, иако неговото заминување од Баварците беше проследено со остри забелешки од двете страни. Полскиот напаѓач викендов се врати во Минхен за да се збогува со поранешните соиграчи и да ги испегла недоразбирањата со управата на клубот.
„Беше чудно чувството да се излезе на теренот за последен пат. Баерн и градот ми значат многу. Моите две ќерки се родени во Минхен. Сакав да се збогувам со сите – играчите, шефовите, вработените во клубот. Никој не може да ни го одземе тоа што го постигнавме во овие 8 години. Секогаш ќе ги паметам петте гола против Волфсбург, рекордот од 41 гол во една сезона и шесте пехари под водство на Ханси Флик“, изјави Левандовски во интервју за „Спорт1“.
„Ќе ми недостасуваат многу работи, но најмногу атмосферата во соблекувалната. Со текот на годините сите ние изградивме посебна врска еден со друг. Ова ги вклучува не само фудбалерите туку и луѓето кои работат во клубот. Сепак, јас сум човек кој гледа напред. Време е да свртам нова страница“, изјави Полјакот.
„За мене беше важно да нема негативни чувства за моето заминување. Ситуацијата беше тешка за сите и моравме да го најдеме најдоброто решение. На крајот на краиштата, сите ние сме луѓе, нели? По 12 години во Германија, беше јасно дека моето време овде истече. Сакав да разјаснам затоа што знаев дека не е лесно Баерн да се согласи да ме продаде. Знам дека моите зборови ги повредуваат навивачите. Ги разбирам и можам само да им се извинам. Во тој момент, сепак, важно беше категорично да ја покажам мојата желба за заминување“, објасни Лева.
„Никогаш не сум имал проблем со Нагелсман и никогаш јавно не сум го критикувал него или неговата тактика. Често разговаравме, бевме блиски. Кога сте на теренот, понекогаш не се согласувате со одлуките на тренерот. Тоа е дел од играта. Отсекогаш сум бил отворен. Мислам дека Нагелсман го разбра мојот избор. Тој е тренер со огромен потенцијал и сигурен сум дека ќе освои многу трофеи“, прокоментира новата аквизиција на Барселона.
„Баерн останува еден од најдобрите тимови во Европа. Тоа се виде и на првите натпревари од новата сезона. Не се сомневам дека без мене ќе постигнат многу голови. Сега другите момци ќе постигнат повеќе голови. Тимот е толку флексибилен и разновиден што не му треба класична „деветка“, смета Левандовски.
Тој, исто така, рече дека е импресиониран од напредокот на Џамал Мусиала и дека не е лут на Кингсли Коман, кој неодамна тврдеше дека Карим Бензема е подобар напаѓач од него.