Британскиот премиер Тереза Меј планира спроведување на конференциски повик денеска со членовите на својот кабинет, за да ги запознае со нејзиниот дијалог со претставниците на Европската унија (ЕУ), кои се дел од напорите нејзини за создавање на „план Б“ за „Брегзит“, соопштуваат медиумите на Островот.
Откако беше одбиен договорот со Брисел претходно оваа недела, британскиот премиер ги продолжи разговорите со европските колеги во обид сепак да се стигне до договор со кој Парламентот ќе го одобри во подоцнежна фаза, и да се избегне сценариото за „хаотичен“ „Брегзит“.
Позициите меѓу политичарите во Кралството за тоа како треба да се води разделбата на Велика Британија со блокот сепак остануваат се така различни, иако до закажаниот датум во март, кога „Брегзит“ треба да се случи, остануваат помалку од 10 недели.
Лидерот на опозициската Лабуристичка партија во Кралството, Џереми Корбин посочи претходно оваа недела дека нов референдум за „Брегзит“ може да биде потребен, но додаде дека сепак преферира одржување на нови избори во Велика Британија, иако премиерот Меј и кабинетот нејзин го преживеаја во средата одржаното гласање за недоверба.
Бизнис заедницата во Кралството веќе упати повеќекратни предупредувања до владата дека спроведување на „Брегзит“ без договор може сериозно да влијае на нивните синџири за испорака и приходите, што од своја страна ќе ги принуди да ги затворат производствени фабрики или да ги преместат надвор од Велика Британија, загрозувајќи илјади работни места.
Голем број европски земји веќе започнаа со подготовките за т.н. „тврд „Брегзит“, откако го зголемија бројот на царинските службеници, ја засилија безбедноста на аеродромите и почнаа расправата за бројни бирократски промени за британските државјани во нив.