Лукашенко нареди формирање на нова доброволна територијална одбрана во Белорусија

од Stefanija Kuzmanovska

Претседателот на Белорусија, Александар Лукашенко, нареди формирање на нова доброволна територијална одбрана во Белорусија, која ќе има меѓу 100.000 и 150.000 членови, пренесува „Ројтерс“.

„Ситуацијата не е лесна. Неколку пати изјавив дека секој маж, и не само мажите, треба барем да знае како да ракува со оружје“, рече Лукашенко на состанокот на Советот за безбедност на Белорусија.

Според претседателот на Белорусија, мажот треба да ракува со оружје „во најмала рака за да го заштити своето семејство, својот дом, своето парче земја и, доколку е потребно, својата држава“.

Министерот за одбрана на Белорусија Виктор Хренин прецизираше дека новата територијална одбрана ќе има меѓу 100.000 и 150.000 доброволци. Идеално, овие единици би биле присутни во секое село и град во Белорусија.

Лукашенко рече дека „украинското искуство“ ја истакнало потребата од дополнителни одбранбени сили.

„Одговорот на секој акт на агресија против Белорусија ќе биде брз, жесток и адекватен“, повтори Лукашенко.

Во извештајот на Меѓународниот институт за стратешки студии (IISS) за армијата на Белорусија за 2022 година, беше наведено дека Минск има околу 48.000 војници и приближно 12.000 припадници на граничната полиција, пренесе „Ројтерс“.

Слични содржини