Калина Малеска застапена во интернационална збирка приказни

од Vladimir Zorba

На 18 ноември во меѓународното училиште MEF во Истанбул, Турција, се одржа промоција на меѓународната збирка приказни насловена Awake not Sleeping: Reimagining fairy tales for a new generation, во која е застапена и македонската авторка Калина Малеска, која воедно е и една од уредничките на збирката. Расказите во збирката се објавени на англиски јазик.

Нејзиното објавување е резултат на иницијативата на Регионалната канцеларија на UN Women (Europe and Central Asia) во Истанбул, која почна во септември 2020 година и опфаќаше низа работилници и покана за пишување раскази кои би преобмислиле постоечки бајки и сказни или би биле авторски приказни со елементи на бајки, на кои учествуваа повеќе од педесет авторки и автори, како и селекција, уредување, илустрирање на расказите и креирање веб-страница за бесплатна достапност на збирката.

Промоцијата беше пренесувана и онлајн, а се состоеше од повеќе делови: излагање од директорката на Регионалната канцеларија на UN Women (ECA), Алиа Ел-Јасир, читање на неколку од приказните од страна на истакнати личности од јавниот живот во Турција, разговор со ученици од училиштето MEF, видео-претстава од страна на македонскиот театар за деца „Сенки и облаци“ на расказот „Детето без златна коса“ на Малеска, панел-дискусија со учесници во проектот и други елементи.

Збирката Awake not Sleeping: Reimagining fairy tales for a new generation се состои од 28 приказни од 25 земји од Европа и Централна Азија. Збриката е достапна на: https://interactive.unwomen.org/eca/fairytales/en/index.html. Илустрациите се на Наташа Коњевиќ. Покрај Малеска, уреднички на збирката се: Анџела Хантер Волш, Дона Џо Наполи и Надиа Алберт/ Инаку, македонската авторка Калина Малеска е застапена со расказите: „Детето без златна коса“ и „Собата со формули на ѕидот“, кои на македонски јазик се објавени и во нејзината збирка Скопје во високата зона (Или-Или, 2021). Збриката е дел од Generation Equality Campaign, а една од идеите е да поттикне размислување и промени во начинот на кој општествата ја перцепираат улогата на жените и девојчињата.

Слични содржини