Елон Маск навести дека е подготвен да преговара за нова цена за Twitter, бидејќи го паузираше купувањето додека не се утврди бројот на ботови на платформата.
Да потсетиме, сопственикот на Tesla и SpaceX се согласи да го купи Twitter за 44 милијарди долари, а потоа одлучи да ги истражи наводите за лажни кориснички сметки.
За време на неодамнешната конференција во Мајами, тој откри дека пониската цена „не е исклучена“, пренесе Bloomberg.
Ботовите се најголема грижа
Американскиот милијардер истакна дека неговата најголема грижа е бројот на ботови на Twitter.
Компанијата проценува дека има околу 5% лажни / спам сметки на платформата, но Маск сака да ја испита оваа бројка.
Поради таа причина, тој го паузираше купувањето, кое вклучува „пенали“ од една милијарда долари (во случај на повлекување), пренесе CNET.
Пад на вредноста на акциите
Овој развој ги намали очекувањата за успех во продажбата, додека акциите на Twitter паднаа за повеќе од 8% (37,39 долари).
За потсетување, Маск се согласи да плати 54,20 долари по акција, што значи дека нивната вредност е веќе драстично помала.
Адвокатите кои ги застапуваат Маск и Twitter не сакаа да ја коментираат можноста да се преговара за нова цена.
Шансите се пола-пола
Аналитичарот на Wedbush Securities, Ден Ајвс проценува дека во моментов има 50% шанси продажбата на Twitter да биде успешна.
Маск го критикуваше начинот на кој платформата ги регулира лажните сметки, а еден од неговите предлози е да се проверат сите корисници.
Истовремено, тој се залага за слобода на говорот, додека неодамна најави можност за отстранување на забраната од сметката на Доналд Трамп, доколку тој стане сопственик.