Министрите за надворешни работи на ЕУ во Луксембург денеска ја истакнаа стратешката важност и геополитичката реалност од влегувањето на новите членки во ЕУ како инвестиција во мир, демократија и стабилност, но не успеаја да се договорат за започнување преговори за членство со С. Македонија и Албанија.
Ова го изјави Ана Паула Закаријас, шефица на дипломатијата на Португалија, претседателството на ЕУ, по завршувањето на министерската сесија на Унијата, пренесува Бета.
Португалската министерка оцени дека денешните меѓувладини конференции на ЕУ со Србија и Црна Гора во Луксембург, иако немало отворање на нови поглавја во преговорите за членство во Белград и Подгорица, „испраќаат поволен сигнал за поврзаноста на Европската унија со експанзијата на Западен Балкан“.
Поддршка на Западен Балкан од 14,6 милијарди евра
Закаријас објасни дека „и покрај сите напори, не беше можно да се постигне договор за рамка за преговори за Северна Македонија и Албанија и да се свика првата меѓувладина конференција со двете земји-кандидати за ЕУ“.
Португалската министерка изјави дека напорите во таа насока ќе продолжат за време на словенечкото претседателство со ЕУ во следните шест месеци.
Таа рече дека шефовите на дипломатиите биле информирани дека е постигнат политички договор со Европскиот парламент за програмата ИПА III на ЕУ за поддршка на реформите на Западен Балкан од 14,6 милијарди евра во периодот 2021-2027 година, што стапува на сила за време на претстојното претседателство на Словенија.