Министерството за надворешни работи на Русија денеска соопшти дека резолуцијата усвоена од германскиот Бундестаг, со која Холодоморот во Украина од 1932/33 година се прогласува за геноцид врз Украинците, е обид да се оправда кампањата за демонизирање на Русија.
„Ова е уште еден обид да се оправда и да се охрабри кампањата за демонизирање на Русија што се шири во Украина и спонзорирана од Западот, за да се свртат етничките Украинци против Русите и другите народи кои живеат во Русија и на територијата на поранешниот СССР“, се вели во текстот на министерството.
Министерството истакна дека Бундестагот молчи за тоа дека во тоа време гладот не беснееше само во Украина, туку и на целата територија на Советскиот Сојуз.
„Пратениците на германскиот парламент од владејачката коалиција и опозицискиот блок на Христијанско-демократската унија/Христијанско-социјалната унија на Баварија, заборавајќи на тоа, решија демонстративно да го поддржат политичко-идеолошкиот мит што го негуваат украинските власти на предлог на ултра- националистички, нацистички и русофобни сили“, се додава во текстот.
Портпаролката на руското министерство за надворешни работи, Марија Захарова, изјави дека резолуцијата на Бундестагот е апсурдна и ги искривува историските факти, пренесе „Спутник“.
Захарова потсети дека западните земји придонеле за гладот од 1930-тите, барајќи од Советскиот Сојуз да плати со жито во трговски размени.
Германскиот Бундестаг со мнозинство гласови усвои резолуција со која Холодомор (масовен глад во СССР на почетокот на 1930-тите) е прогласен за геноцид врз Украинците.