Македонскиот полициски синдикат како единствен реперезентативен синдикат во Министерството за внатрешни работи најостро ги осудува нападите врз полициски службеници на протестите против францускиот предлог.
-Македонскиот полициски синдикат го известува своето членство и целокупната јавност во нашата држава, дека во континуитет работи и сериозно се залага да се документираат и да се профилираат сите напади врз полициските службеници при вршење на работните задачи и притоа да се идентификуваат евентуално системски недостатоци , во контекст на отстранување на недостатоци во системот на заштита на нашите колеги.
Цврсто сме решени да го интензивираме овој процес што бара постојана опсервација и ангажман , но исто така сме сигурни дека само така ќе овозможиме натамошно унапредување на позицијата на полицискиот службеник во делот на неговата лична безбедност и заштита на неговото здравје.
Трендот на напади врз полициски службеници само затоа што професионално си ги извршуваат работните обврски и задачи , спроведувајќи го законот мора да запре.
Сметаме , уверени сме и стоиме цврсто на ставот дека секој напад врз полициски службеник , односно било какво девијантно однесување кон , пред се – луѓето , кои секојдневно се грижат за безбедноста , редот и мирот во нашата држава , на индиректен начин претставува напад врз Република Северна Македонија.
Правосудните органи мора да започнат да ги процесуираат нападите врз полициските службеници во најбрз можен временски рок , притоа паралелно да се заостри казнената политика , со цел елиминирање на појавата на напади врз полициски службеници.
Како синдикат , сметаме дека ова е единствениот начин , за да бидеме сигурни , дека во случај на напад врз полициски службеник , институциите ќе реагираат брзо и ефикасно , за да сторителите бидат најстрого санкционирани, стои во соопштението од МПС.