НАТО и Европската унија (ЕУ) треба поконкретно да дејствуваат на Западен Балкан, за да се зачува мирот и да се обезбеди безбедност, изјави началникот на Генералштабот на Армијата на Црна Гора, Зоран Лазаревиќ.
Министерството за одбрана соопшти дека Лазаревиќ учествувал на состанокот на Воениот комитет на НАТО, на ниво на началник на Генералштабот, што се одржал во седиштето на Алијансата во Брисел.
Состанокот бил посветен на операциите, мисиите и активностите на НАТО, со посебен осврт на подготовките за претстојниот Самит во Вилнус, кој ќе се одржи во јули.
Соопштено е дека на средбата Лазаревиќ го истакнал континуираниот придонес на Црна Гора за подобрување на капацитетите на Алијансата и нејзината целосна посветеност на процесот на одвраќање на агресијата врз членките на Алијансата.
„Тој посочи дека Црна Гора целосно го поддржува и придонесува за функционирањето на мисијата КФОР на Косово и укажа на потребата од поконкретна акција на НАТО и ЕУ во регионот на Западен Балкан, со цел да се зачува мирот и да се обезбеди безбедност“, се вели во соопштението на МО на ЦГ.