Кошаркарите на Милвоки Бакс, актуелни шампиони во НБА лигата, ја посетија Белата куќа, каде домаќин беше американскиот претседател Џо Бајден.
Традицијата продолжи и по пет години, а Бакс станаа првиот тим по Кливленд, кој го прими Барак Обама во 2016 година во Белата куќа.
За време на мандатот на Доналд Трамп, таа традиција беше прекината поради несогласување со тогашната политика на претседателот, па така Голден Стеј, шампионите од 2017 и 2018 година и Торонто Репторс, шампионите од 2019 година, и шампионите од 2020 година, Лос Анџелес Лејкерс не дојдоа во Белата куќа. Последните и поради тогашните рестриктивни мерки поради пандемијата на коронавирус.
Кошаркарите на Милвоки минатата сезона, точно педесет години по првиот, го освоија вториот прстен во историјата, а во оваа прилика на претседателот Бајден, 46-ти по ред во американската историја, му го врачија дресот со број 46.
„Беше одлично. Никогаш не ги земам ваквите моменти здраво за готово. Никогаш, никогаш. Се трудам да апсорбирам сè, да го ценам овој момент. Целата таа напорна работа се исплати. Да се биде тука со соиграчите, тренерскиот штаб, брат ми. Тоа беше долг пат. Средбата со претседателот е неверојатна“, рече Јанис Адетокумбо.
„Тоа беше неверојатно патување. Ние бевме најлошиот НБА тим, а потоа осум години подоцна пристигнавме во Белата куќа, го запознавме претседателот, се фотографиравме. Мораме да останеме скромни, неверојатни работи се случуваат во животот“, додаде Гркот.