Во тешка сообраќајна несреќа што се случи вчера во Бугарија, кога се преврте автобус со деца од Србија, повредени се повеќе од 10 лица, а две деца се во тешка состојба и денеска ќе бидат префрлени на детската неврохирургија „Пирогов“.
Две повредени деца претпладне ќе бидат пренесени на детската неврохирургија „Пирогов“. Тие во моментов се во болницата во Стара Загора, изјави за новинарите вршителот на должноста министер за здравство д-р Асен Меџидиев.
„Во моментов се хоспитализирани 14 лица – двајца возрасни и 12 деца. Децата се стабилни, освен две. Ќе бидат потребни оперативни интервенции. Двете деца со специјална екипа ќе бидат пренесени до „Пирогов“ во 09.00 часот. Таму имаме закажано состанок со неврохирург. Постарите моментално се во добра состојба. Едниот на кој му е ампутиран екстремитетот е стабилен“, додаде министерот за здравство, пренесува „Нова.бг“.
Инаку, повреденото дете, кое е во тешка состојба, се здобило три скршеници на карлицата и колкот. Уште едно дете е сместено на одделението за интензивна нега за набљудување.
„Другите деца се во релативно добра состојба. Тие се на возраст од 9 до 15 години. Повеќето од нив имаат посттрауматски рани“, рече тој.
Дел од децата повредени во тешката несреќа веќе се отпуштени. Тие биле однесени во хотел во градот.
Во автобусот имало 38 деца, десет возрасни и еден возач. Децата се дел од фолклорниот ансамбл ЈУ-ЛИРА. Повеќето од нив се од Батајница. Во моментот кога се случила несреќата тие се враќале од фолклорен фестивал кој се одржувал на брегот на Црното Море.